خذني معك
يبويه اوياك أريدن ينحفر گبري شلي ابعمري امن اظل متمحّنه ابدهري
* * *
العمر يابويه بافراح او حزن مكتوب تطيب اگلوب بايّامه او تشيب اگلوب
وأنه ابدفتر حياتي بس حزن مكتوب او كُبر بيّه الحزن يابويه من زغري
* * *
كُبر بيّه الحزن واترعرع ابهل دار أصد لاُمّي أشوفن تبچي عالمحتار
أصدّن ليك أشوفك بالصبر محتار وعلي' صبرك صبرت او ما نفذ صبري
* * *
صبرت اسنين بين الا´ه والحسره لچن فاض الصبر بمصيبة الزهره
يبويه العصره آه اشسوّت العصره بيها الكِسر ضلع اُمّي كسر ظهري
* * *
انكسر ظهري يبويه او جرحي شيطيبه او دليلي امصوّب ابضربات مو ضربه
ضلع اُمّي واخويه الطاح علعتبه والبسمار ناره بالحشه تسري
* * *
نيران ابدليلي او بالحشه تسعر او صفالي امن العمر بس اءنته يا حيدر
او كبرت اوياك وآمال الگلب تكبر من تحضر تنشّف دمعتي التجري
* * *
تنشّف دمعتي وتورّد آمالي واحسّ ابهيبتي لو شفتك اگبالي
لچن يا بدري لحظه ما اءجه ابّالي تغيب او ينطفي ابريع العمر بدري
* * *
يداحي الباب غاب البدر بغيابك يبو الاطياب ظلمه الليله محرابك
عساني اتصوّبت يابويه بصوابك صدگ دمّك يبويه ابمسجدك يجري
* * *
صدگ راسك يبويه ابهامته مصيوب صدگ شيبك يبويه بالدمه مخضوب
صدگ طايح ابمحرابك يداحي البوب يبويه اليوم طاح ابطيحتك خدري
* * *
يبويه اليوم طاح ابطيحتك جدّي يبويه اليوم راحت اُمّي من عندي
يبويه اليوم علمحسن عطب چبدي يبويه اليوم بسمار العِده ابصدري
* * *
صدگ أسمع تصيح الناس حيدر مات صدگ وحدي صرت يا حاضر الشدّات
عسه اعيوني يبويه اثنينهن عميات وين انطي الوجه يابويه ما أدري
* * *
وين انطي الوجه يابهجة اعيوني يبويه اعداك بغيابك يظلموني
او يشتموني او يضربوني او يأسروني يريت الموت آنه او لاطيحن أبأسري
* * *
يبويه ما دريت العيد جايينه او عله العاده تجي الوادم تهنّينه
يبويه اشلون لو گالوا علي وينه شنطي اجواب يابويه او شنو عذري
(1990) للشاعر الحاج هيثم سعّودي الكربلائي..
o`kd lu; hgvh],] fhsl hg;vfghzd l;j,fm