راسك گطع راسك * ماخمدت أنـفـاسك
يالـمنظرك دامي = حي إنت گدّامي
ماخمدت أنفاسك
***
كلما أريد أنظرك ..بالماي اتصوّرك .. والـماي يـعكس صِـوَر
يرسم گطع منحرك ..دمه إعله دم خنصرك ..شلاّل يجري بنهر
إسما أشرب اتذكّرك ..إيفت الگلب منظرك ..جسمك تگطّع وذر
أنظر قُـطُب مـحوَرك ..راسك صُبَح منبرك ..وعْليه أطيل النظر
أشبحله بنظاري = وأسترخي بأفكاري
ومن تكتب أقلامي =حي إنت گدّامي
ماخمدت أنفاسك
***
لـمصـيـبتك أسـتِــمع ..صدر الحزن يـتّـسع ..وگلب الدمع يـنفجر
ومن يجري روج الدمع .. كل دمعه ترسم ضلع .. وكل ضلع حاضِن بدر
وكل بدر نـحره نبع ..حاضن جسد منصرع ..وكل جسد للدم جسر
وكل جسر بيه منوضع .. وجه النبي ومنطبع .. مرتفع خيـمة صبر
من يشكي للباري =دمع الجفن جاري
من جرحك السامي =حي إنت گدّامي
ماخمدت أنفاسك
***
أذكر عطش چبدتك .. وجمر الغضه ابـمهـجـتك .. كلما أشوف العذِب
أتذكّر امصيبتك .. واحضن جسد دمعتك .. يرتـجف برج الگلب
أذكر حـجر جبـهتـك .. ودم الخضب شيبتك ..واتصوّر إعله التُـرُب
الخيل من داستك .. طحنت صدر جثّتك..ومرجان دمّك يصب
محرابك بروحي =يستنطق اجروحي
ومن أسأل آلامي =حي إنت گدّامي
ماخمدت أنفاسك
***
موسى الكليم أصبحت .. وِلــْمِـدْيَن إمْن اوصلت .. مَـشْربت من الـمـاء
من النجيع إشربت ..ابطور الطفوف إصْعَقِت .. طفك صُبَح سيناء
إعليك العَوالم بـچت .. ليك الـمنيّه لِـفَت .. تـمشي عله إسْـتحياء
أوصالك إتـگطّعت .. وي وجه ربك غِدَت .. تـتـكلّم الأشـلاء
ربّك تِـجلاّلك = كلّمته بأوصالك
يالمنذبح ظامي ..حي إنت گدّامي
ماخمدت أنفاسك
***
يحسين وبنينوى .. مو جسمك الّي هِوه ..جسم الأرض منصرع
إنت إعله وادي طِوى ..امن الباري شعلك ضوه .. فوگ الشُهُب مِرتِفع
گلبك الربّك هِوى ..الدين ابدماك إرتوه .. من نـحرك الـمنگـطع
عالعرش من إستِوَى .. سلّـمك ربّك لِوا .. متخضّب امن النَجِع
وهاذه اللِوا مضخور = للغايب المنصور
بكل دورة أيامي =حي إنت گدّامي
ماخمدت أنفاسك
***
يحسين ناده الـمَلَك ..مَـحّد گطع راس إلك .. انت اگطعِت راسك
الباري يـتـأمّـلك .. عِـبـر الزمن راسِـلك .. وتـفايض إحساسك
دم النحر فاض إلك ..ضحّيت إله بكل هَلَك .. ونطيته عبّاسك
سَـيـَّرت رَكب الفلك .. كلـمن يضدك هَلَك .. بالدم ثـبت ساسك
راسك رُفَـع رُمـحه= فـجرك طلع صُبحه
يامُنقذ إسلامي =حي إنت گدّامي
ماخمدت أنفاسك
"
vhs; گ'u * lhol]j HkJtJhs;