((تمايلنه طرب))
========
تمايلنه طرب يوم الأجـــــــــه التغير=للصندوك رحنه بحيل وبهمــــه
كلنه الشيعه ذوله اولاد داحي الباب=ليالي البيض حلت راحة الظلمــه
راح الفقر ولى والليالي الســـــــود=واصبحنه بنعيم وحلت النعمـــــــه
اسف والله عليكم خابت الآمــــــــال=وصار البعث عدنه يُذكر برحمــــه
بيضتوا وجه صدام وبن سعـــــــود=وصبحنه عليكم ندعوا بالنقمـــــــه
كثره احزاب صارت والشعب محتار=على نفسه انقسم هاجم فرد هجمه
يا روس التحالف ليش هذا صــــار=خجلتوا علي وحسين ابو اليمــــــه
---------
على حساب المناصب خنتوا الكرار=على ناي الدواعاش صارت النغمه
يامن تدعي شيعي وتحب حســــين=روح استطلع التاريــــــــخ وفتهمه
ابن وقاص يعرف فضل ابوالسجاد=لجن حب الرئاسه اذهب بحلمــــــه
مثل ما أنت طامع بالكراسي اليــوم=عمر هم جان يطمع بالري وحكمـه
إذن لو جنت أنت بكربلــــه موجود=هم تذبح المولى وتحرك خيمـــــــه
تكطع جف أبو فاضل وتسلب جود=وعبد الله الطفل هم تسفك الدمــــــه
وتسبي العايله وتروع النســــوان=وقانون التقيه تفعله وتحكمـــــــــــه
اذن بيضتوا وجه يزيد يا أوبــاش=وسودتوا اوجوه الشيعه والأمـــــــه
فضحتونه بطمعكم يا وجوه الشوم=عسى واحدكم اسليمه تجي تطمــــه
المناصب زايله والموت حتماَ جاي=فكر ياغبي بكبرك وبالظلمــــــــــــه
شنهي قيمة المنصب عليه تبجون=المنصب من علي بالحشر نستلمـــه
=========
لاجن للأسف موكل ركب خيــــــال=ولا كل سيف بالميدان اله حرمــه
ولا كل التعكل يعني ابن جـــــــواد=ويحل الحجي وبســــــرعه يفتهمه
ولا كل البس له رباط يعني استــاذ=ولا كل المدشدش امي نتهمــــــــه
ولا كل المصخم يعتبر حـــــــــــداد=ولا كل المعمم يعني بالقمــــــــــــه
ولا كل العشك يعني صبح مجنـون=نصدك دعوته والناس تحترمــــــه
ولا كل اليكول آني احب حسيــــن=مخلص بالمحبه وصادق الجلمــــــه
المحبه موش دعوه ولقلقه بلسان=المحبوب الحبيبه يضحي بدمـــــــه
بس عابس صبح مجنون بالتاريخ=الف رحمه على روح الوالدة امـــه
كوموا توحدوا يا لشيعة تتسمـــون=لجل راية علي ترتفع بالقمــــــــــه
صدقوني الأمر مرسوم بالتكــوين=لعد كلشي نهايه من الله متحتمــــــه
بالتالي ألأمر محـسوم لهــل البيت=مثل ما فـتح بيهم بيهـُم الخــتمـــــــه
مثل ما فتح بيهم بيهم الختمه
سيد
كاظم الشرع