بسم الله الرحمن الرحيم
طريقة
تحضير القوزي
المـــــــــواد والمقادير
+++++++++++++++++
1 – لحم شرح (( قطع جبيرة )) 3 كيلو غرام و اكثر بعد احسن
2 – بتيتة كبار شوية 1.5 كيلو ونص
3 – شعرية جيس واحد كافي
4 – بزاليا وجزر حوالي نص كيلو
5 – بيض عدد 6 بيضات مال دجاج
6 – ماجي حتى يزيد من المزة مال التشريب عدد باكيت واحد (( قطعتين صغار )) كافي
7 – تمن بسمتي حوالي 3 كلاصات كبار
+++++++++++++++++
التحضير للطبخ
+++++++++++++++
1 – نجيب اللحم نغسلة بالمي ونسوي القطع مالته من كبيرة الى متوسطة الحجم
2 – نجيب البتيتة نكشرها ونقطعها نسويها مكعبات متوسطة الحجم
3 – البزاليا والجزر نكمشهن نفرغهن بماعون او طاسة و انكعهن بالمي ونغسلهن
4 – نحضر الطاوة نحميها ونخلي بيها كمية بسيطة من الزيت لقلي البصل
5 – نروح نجيب جدر مال طبخ جبير شوية ونحطة على النار العالية ونخلي بيه زيت مال يقارب نص استكان ونخلي يحمى على النار
++++++++++++++++++++++
الطبخ والتعامل مع المواد
++++++++++++++++++++++
- نجيب اللحم المغسول ونخلي بالجدر الي احنا من الاساس مخلين بيه زيت وعلى النار اندير اللحم بالجدر ونبقى نگلب اللحم بالزيت حتى يتسهى لمدة خمس دقايق وراها نضيف المي الفاير ما يقارف كتلي او كتليين يعني بحيث الكمية مال المي الفاير تغطي اللحم باربع اصابع .. ويبقى بالجدر على النار لحد ما يفور و نشيل الزفره مال اللحم (( والي هي شكلها لونها جوزي او اصفر بعض المرات تطلع مثل الگشوة فوك اللحم من يفور لازم تشيلوها بسرعة )) بعدين تقبغون الجدر وتعيفون اللحم لحد ما يستوي على نار عالية لمدة ثلاث ارباع الساعة ولازم كلما ينقص المي تضيفون شوية
- البتيتة : نكشرها ونسويها على شكل مكعبات وراها نحطها بجدرية بيها مي بارد لمدة 7 دقايق حتى شوية البتيتة تبش بش و تصير طيبة بالاكل .. بعد الــ 7 دقايق جيبي الطاوة وحطي بيها كمية من الزيت الي تساعدج ان تگلين البتيتة براحتج ولازم يكون الزيت حار كلش وراها تكلين البتيتة لحد ما يصير لون البتيتة اسمراني المهم يصير لون البتيتة اسمر فانت لازم تعرفين انه هنا لازم اطعين البتيتة وتخليها بجدر فارغ وهذا الجدر راح نخصصة للحشوة مال
القوزي (( جدر فارغ ويكون ناشف مبيه مي )) وهكذا لحد ما تخلصين التگلاة مال البتيته
- البزاليا : نجيب الطاوة وبيها شوية زيت ونخلي شوية بصل مثروم ناعم كلش ونخليه بالزيت ونبقى نكلبة لحد ما يصير لون البصل على صفار شوية نضيف شوية كركم قليل كلش اقل من خاشوگة جاي وية البصل وراها نضيف البزاليا والجزر للبصل ونبقى نقلبهم شوية نضيف خاشوكة اكل زيت زيتون (( تدرين ليش زيت زيتون ؟؟ )) نضيف زيت الزيتون حتى ينطي الحشوة ريحة طيبة وطعم طيب .. وراها نجيب شوية دارسين ونضيفة للحشوة حوالي نص خاشوكة اكل دارسين وخاشوكة كوب كاري هندي لحد ما نشوف المواد انسجمو كلش البصل والجزر والبزاليا نجيب الطاوة ونفرغها بجدر الحشوة الي بيه البتيتة
- الشعرية : نجيب الطاوة مرة ثانية ونخلي بيها زيت قليل ونضيف الشعرية ولازم تكون النار هادئة شوية ونبقى بالخاشوكة نكلب الشعرية لحد ما يصير لونها اشقر (( اموت على الشُگُر )) وراها نضيف الشعرية للجدر مال الحشوة مع ملاحظة تقليل الزيت شوية
+++++++++++++++++++
التنسيق قبل صب الاكل
+++++++++++++++++++
1 – نجيب شوية من التشريب مال اللحم وندير على الحشوة الي هي البتيتة والشعرية والبزاليا والجزر ندير شوية عليهم تشريب وعلى نار هادئة كلش علمود يبخرون وتصير بيهم نكهة التشريب مع ملاحظة اضافة شوية بهارات برياني والمقدار هو خاشوكة ونص مال اكل ونضيف حوالي خاشكوتين كوب ملح للحشوة او اقل بقليل
2 – نجيب البيض المسلوك ونسويه على شكل درك او شرائح ونحضرة علمود نحطة فوك اللحم
+++++++++++++++++++
الصب بالصينية
+++++++++++++++++++
1 – نجيب اول شئ التمن الابيض نحطة بالصينية ونفرشة بالصينية
2 – نجيب الحشوة الي هي البتيتة والبزاليا والشعرية ونفرشها فوك التمن
3 – نجيب البيض على شكل شرائح او درك ونخليه فوك الحشوة مال التمن
4 – نجيب اللحم ونخليه فوك البيض والحشوة
++++++++++++++++++
سوالف مكسرة
++++++++++++++++++
- اذا يعجبكم شوية لبن مخفوق بالخلاط
- زلاطة ام الخيار والطماطة والخل
- تشريب مال اللحم تخلوه بطاسة وية القوزي
'vdrm jpqdv hgr,.d