يايوم اشوف اعتابك
يايوم اشوف اعتابك .... واوكف حزين ببابك
وارجع ازورك يا حيدر .... وارجع ازورك
طوّل علية غيابك .... مشتاك اشم ترابك
وارجع ازورك يا حيدر .... وارجع ازورك
آنة الهويتك .... لا تظن نسيتك
---------------------------
علي وهذا الاسم يسري بشرايين .... نبع يل ما تـمل شوكك رياحيني
عتب وياك عندي يراوح بعيني .... يـمن فركاك كدر صفوة سنيني
اريد احجي بصراحة وياك خليني .... اخاف مكدرات اجو تنسيني
يابة الحسن ما تدري .... صرت اشتريهة بعمري
شوفت ضريـحك يا حيدر .... شوفت ضريـحك
من الفركة نافذ صبري .... وضلت تعيش بفكري
شوفت ضريـحك يا حيدر .... شوفت ضريـحك
بروحي اشتريتك .... لا تظن نسيتك
---------------------------
اللازمة
---------------------------
عشت اعوام يـمك يا ربيع الحي .... ماعوفك جنت مثل الجرف والمي
لو صرت بهجير اكصد الك يا فـي .... ولو ليلي الوكت دلهم اشوفك ضي
غصب من جنتك طلعوني اهل الغي .... وخلوني اظل لا ميت ولا حي
من جنتك حرموني .... برجوة امل خلوني
كل فكري يمك يا حيدر .... كل فكري يمك
عنك غصب بعدوني .... امشي وادير عيوني
كل فكري يمك يا حيدر .... كل فكري يمك
عشت بثنيتك .... لا تظن نسيتك
---------------------------
اللازمة
---------------------------
مو بيدي غصب عفتك يابو الحسنين .... وعنك رحت اتلفت وادير العين
كلت هل الفركة بالميت شهر شهرين .... طالت يا علي لا سنة ولا سنتين
اناشد عالصبر ما ادري دربة منين .... خذن ثلثين حيلي مخلفات البين
دنيانة نفرت عني .... وحتى الصبر مل مني
مشتاك اشوفك ياحيدر .... مشتاك اشوفك
اغفة بوسادة ظني .... واصحة على دمعي ووني
مشتاك اشوفك ياحيدر .... مشتاك اشوفك
ياما نـخيتك .... لا تظن نسيتك
---------------------------
اللازمة
---------------------------
البعد شيبني يامن فركتك كلفة .... جرح شوكي غميج وما وكف نزفة
ليالي الضيم باكت بسمة الشفة .... وسنيني انكضت بالحسرة واللهفة
لجن بعدة الامل بالروح مايـخفة .... وحس روحي بعد هلهل وكت ترفة
من عيني ينزف موحي .... وانة بترافة روحي
ارسم خيالك ياحيدر .... ارسم خيالك
هالحبر دم جروحي .... وصرت بصحيفة نوحي
ارسم خيالك ياحيدر .... ارسم خيالك
بروحي لكيتك .... لا تظن نسيتك
---------------------------
اللازمة
---------------------------
بـخيالك عايش من سنين واتـحسر .... ولا ادري مصيري شلون ياحيدر
صرت ما اشعر بطعم البرد والحر .... واذا نسمة هوة تزاحمني اتكدر
جمر ضيمي بصميم حشاي يتوجر .... وبعيني غدة عبراتي تتكسر
ماعندي غفوة بنومي .... ولاصحوة تـجلي همومي
حيرني بعدك ياحيدر .... حيرني بعدك
مامش سعد بنجومي .... ولافرحة تسعد يومي
حيرني بعدك ياحيدر .... حيرني بعدك
ترحمني ريتك .... لا تظن نسيتك
---------------------------
اللازمة
---------------------------
ياوهجة عشك ناغت خلاية الدم .... خلافك عمري ذروة وضايعة بـمنجم
بغيرك شمل روحي ما بعد يلتم .... يابو الحسنين انت الجرح والبلسم
يايوم اوصلك واكشف سحاب الهم .... وانفض يـم ضريـحك كل غبار الهم
يايوم اصل يـم كبرك .... وانصب مناحة بكترك
وابـجي لمصابك ياحيدر .... وابـجي لمصابك
يلماصفالك دهرك .... اذكر مرارة صبرك
وابـجي لمصابك ياحيدر .... وابـجي لمصابك
واذكر رزيتك .... لاتظن نسيتك
---------------------------
اللازمة
---------------------------
اتـمنى مثل هل اليوم جنت هناك .... واجدد يـم ضريحك هل العهد وياك
وانصب مأتم على مصابك وانعاك .... وون ون الثكالة لفكدك و فركك
لجن ما نسيتك عايش بذكراك .... ضميري من البعد يابة الحسن ناداك
بين الدمع والحسرة .... اذرك لهيب الطبرة
يصعب مغيبك يا حيدر .... يصعب مغيبك
من عيني تجري العبرة .... وبين الجوانح جمرة
يصعب مغيبك يا حيدر .... يصعب مغيبك
بالهم بجيتك .... لا تظن نسيتك
الرادود باسم الكربلائي وكلمات الشاعر جابر الكاظمي
dhd,l ha,t hujhf; hgvh],] fhsl hg;vfghzd l;j,fm