يا ليل الحـزن طــول وخلهــا تودع الوليان
باجر مايضل عدها اخوه التحرس الصيوان
****
طول من تمر يالليل خليها تودع احسين
تريد تگابل العباس وتكحل باخوها العين
باجــر لو اجـه باجر تصوبهـا سـهام البين
والاخوه تطيح اجساد وغاطيها ذره التربان
***
باجر شمعة العريس سهم الموت يطفيها
وبدال الحـنه من ادماه اجفوفه يحنيهــا
رمله تودع القاسم وأمــه الفــرگه تاذيهـا
تزفه باجر اعله الموت ابنها وزهرة الشبان
****
يا ليل الحـزن والنـوح گــلبها اشلـون يتصبر
تشـاهد عالثره مذبوح شبيه المصطفه الاكبر
حاطت بيه جموع الناس جسمة امگطع موذر
علي الاكبر عزيز حسين تون امه بگلب لهفان
****
باجــر مايضــل عـدها لا والــي ولا نغـــار
وحيده اومحد وياها ماضلت زلــم و أنصار
مذبوحه عله التربان وأخيمّها تشب بالنــار
وفرت خايفه الاطفال تدور عن گمــر عدنان
***
اخوهـا باجر تشوفه ذبيح اموسد الغبره
حسين الجان وياهه تشوفه منگطع نحره
اويلي ياگلب زينب عليهم ياعظم صبره
زينب من بعد عزها تحاوط زينب العدوان
***
ياحيدر تعال وشوف حسين امسلبه اهدومه
يسيره ام الخدر صارت عگب اخوتها مهمومه
ضحايا اجساد عافتهم مشت للشـام مظلـومه
تعال و شاهد الحاله حسينك منذبح عطشــان
****
ابو سلام الفتلاوي
dh gdg hgpJ.k 'JJ,g ,ogiJJh j,]u hg,gdhk - g'ldm