المستهل
ـــــــــــــــــ
لحسين أبو الأحرار * من طلعت الأنصار للطف تحارب
من ضحوا الأعمار * تتبعهم بإيثار
هاي المواكب
( 1 )
نتبع نهج أبو السجاد ... ونواسي فاطمة الزهره
ومثل موقف حبيب وجون ... يخسف كل محب صدره
نرفع ألهم الرايات ... بفخر موقفهم أنذكره
وبهاي المواكب كون ... ناخذ منهم العبره
ننحب على المذبوح * وأنضحي لجله الروح
يوم النوايب
لاماتمسنه النار * تتبعهم بإيثار
هاي المواكب
( 2 )
كل واحد يهد أجبال ... ذوله أصحاب أبو اليمه
مسلم أول الأنصار ... وگف بالكوفة أبن عمه
رغم أنف الظلم ماخان ... بذل لجل السبط دمه
يقاتل كالجبل بالسيف ... ياهو اليگرب ليمه
نهمل دموع العين * مسلم رسول حسين
هز الكتايب
وأحنه بهدى الأنوار * تتبعهم بإيثار
هاي المواكب
( 3 )
يوم العاشر الأنصار ... ماظل كل صبر بيهه
غدت تتسابق أعله الموت... تريد أتوافي واليهه
هذا الحر بعد ما چان ... غصب للطف يوديهه
خط بدمه فوگ الگاع ... حر بدنيته أعليهه
الحر صبح مظلوم * خالد يظل للدوم
مارده خايب
من نذكر اللي صار * تتبعهم بإيثار
هاي المواكب
( 4 )
مثل عابس يريت أنصير ... مايهده الدمع بالعين
مدارس خله للعشاگ ... نصبح مثله مجنونين
لحباب السبط عبره ... كلمن هالدرب ماشين
عابس بالفخر ذكره ... قدم نحره لجل الدين
چان بعزم وإقدام * ينزل على الظلام
بأرض الحرايب
لهل العشگ تذكار * تتبعهم بإيثار
هاي المواكب
( 5 )
حبيب أعله النهج ماشي ... قدم لوحة الأبطال
وبعزم اليصون الدين ... ضد أهل الكفر من صال
تخلد ذكره بالتاريخ ... غدت تتناقله الأجيال
فده لعين السبط روحه ... چان أعله العده زلزال
موقف فخر للناس * سجلهن بإخلاص
نذكرهه واجب
ولموقف الثوار * تتبعهم بإيثار
هاي المواكب
( 6 )
مواكبنه بحزن كل يوم ... نواسي بيهه گلب حسين
نهل لأبن الزچية أدموم ... خل تصبح دموع العين
ولجل حب السبط الأرواح ... نضحي وأحنه ممنونين
يا أعظم ذبح بالكون ... أحنه أعله النهج ماشين
نتبع خطى الأطهار * رغماً على الأشرار
والكل يواضب
للخدموا الأقمار * تتبعهم بإيثار
هاي المواكب