' أيها المهر توقف '
للشاعر نادر التتان
يا مهر الألم شلي سويته .. خيالك علي وينه وديته
رحت وين يا ابو المصايب .. علي وين رد عالحبايب
أصعب احساس انخلـﮓ .. يغمرك حسره و ندم
و انته تركض للأمل .. توصله و يطلع ألم
يا فرس الأكبر علي .. ما تمنيت العدم
و انته رايح للعدا .. و على بالك للخيم
يا ﮔـاسي .. ألومك أنا و ﮔللبي يتعب
يا ﮔـاسي .. ذبح فعلك حسين و زينب
الكل ينتظر و إنته متباعد .. و ما تدري الولد يوحش الوالد
شيردك للخيمه تالي ..
شيردك و العفته غالي ..
شيردك ..
*** *** ***
يا مهر الألم شلي سويته .. خيالك علي وينه وديته
رحت وين يا ابو المصايب .. علي وين رد عالحبايب
كفكف جروحه المهر .. يلطم بعرفه الصدر
مو أنا الخنت بعلي .. و هم من الـﮕـللب أعتذر
هو ﮔـال بطبرته .. لا توديني الخِدر
لا أﮔـابل والدي .. و ما فديته بهالعمر
يا عيني .. على الغالي غمضي يا عيني
يا عيني .. عن أحبابه هاللحظه ويني
جاوبته بعجل خلني بروحي .. عوف انته السرج و ارحم جروحي
حبيبي دمك على العين ..
حبيبي درب الخيم وين ..
حبيبي ..
*** *** ***
يا مهر الألم شلي سويته .. خيالك علي وينه وديته
رحت وين يا ابو المصايب .. علي وين رد عالحبايب
يا مهر لك ﮔـلب وعين .. و انته شفته ينجدل
هذا يطعن بالرمح .. و هذا يرميه بنبل
الله يا حزن السما .. هذا الأكبر منجدل
لو هو جده المصطفى .. نايم بحر الرمل
مصيبة .. جبت لينا بعد انتظارك
مصيبة .. و بعد شل يفيد اعتذارك
حين الخبرك عالثرى اتركني .. و خبر والدي بسرعه يدركني
تركته ويا الأعادي ..
تركته وسط الهنادي ..
تركته ..
*** *** ***
يا مهر الألم شلي سويته .. خيالك علي وينه وديته
رحت وين يا ابو المصايب .. علي وين رد عالحبايب
شفت أبوه حسين يلم .. ﮔـطعه ﮔـطعه بالعنى
ما انحنى و يوم طلعت .. عمته ظهره انحنى
و صار يناديها ارجعي .. يـَختي شتحمل أنا
زينب أحسب طلعتـﭻ .. أﮔـسى من فـﮕـد الظنى
أويلي .. على الما تهنا بشبابه
أويلي .. على حسين أبوه بمصابه
لو فاد الدمع فادت آلامي .. أصهل و الأسف يمشي جدامي
يا الأكبر ﮔـبل ابتعادك ..
يا الأكبر سامح جوادك ..
يا الأكبر ..
*** *** ***
يا مهر الألم شلي سويته .. خيالك علي وينه وديته
رحت وين يا ابو المصايب .. علي وين رد عالحبايب
' Hdih hgliv j,rt ggahuv kh]v hgjjhk